តើអ្នកបានដឹងអ្វីខ្លះពីបញ្ហាជុំវិញជំងឺភ្នែកក្រហម?
ភ្នែកក្រហម (Conjunctivitis) គឺជាជំងឺឆ្លងបង្កឡើងដោយការរលាកភ្នាស់ពណ៌សនៃគ្រប់ភ្នែក។ បើអ្នកជំងឺកើតជំងឺភ្នែកក្រហមមួយចំហៀង ហើយមានការយឺតយ៉ាវក្នុងការព្យាបាល នោះវានឹងឆ្លងរាលដាលទៅកាន់ភ្នែកមួយចំហៀងទៀត។
១. រោគសញ្ញា
- មានអារម្មណ៍រកាំភ្នែក
- ហើមត្របកភ្នែក
- ហូរទឹកភ្នែកច្រើន
- ស្រវាំងភ្នែក
- វាអាចឆ្លងទៅភ្នែកម្ខាងទៀតក្នុងរយៈពេលមួយអាទិត្យ
២. មូលហេតុបង្ក
- ឆ្លងតាមរយៈដៃកខ្វក់ដែលមានផ្ទុកមេរោគ ឬ បាក់តេរីយកមកប៉ះពាល់ដោយផ្ទាល់នឹងភ្នែក
- អាចមកពីសារធាតុគីមីនៅតាមខ្យល់អាកាសហុយប៉ះកកិតខ្លាំងទៅលើកែវភ្នែក ។
៣. វិធីការពារ
- យើងត្រូវប្រាកដថា រាល់សម្ភារៈដែលប៉ះពាល់នឹងកែវភ្នែក ដូចជា កន្សែង សម្លៀកបំពាក់...គឺស្អាតជានិច្ច។
- សម្រាប់អ្នកចូលចិត្តហែលទឹក គួរប្រើប្រាស់វែនតាការពារភ្នែក ព្រោះជាតិក្លរក្នុងទឹកអាចធ្វើឱ្យភ្នែកក្រហមបាន។
៤. វិធីព្យាបាល និងកាត់បន្ថយអាការនៃជំងឺភ្នែកក្រហម
ជាធម្មតា ជំងឺភ្នែកក្រហម នឹងបាត់ទៅវិញដោយខ្លួនឯងក្នុងរយៈពេល ១ ទៅ ២ សប្ដាហ៍ បូកផ្សំដោយការប្រើប្រាស់ថ្នាំបន្តក់ភ្នែក ឬថ្នាំផ្សះដែលមានការណែនាំពីគ្រូពេទ្យ។
ក្រៅពីនេះ យើងអាចព្យាបាលជាមួយនឹងវិធី ២ យ៉ាងទៀតគឺ៖
វិធីទី១៖ យកក្រណាត់ស្អាតជ្រលក់ទឹកក្ដៅឧណ្ហៗស្អំលើភ្នែករយៈពេល ៥ ទៅ ១០នាទី។ សូមអនុវត្តវិធីនេះ ៣ ទៅ ៤ដង ក្នុងមួយថ្ងៃ។
វិធីទី២៖ ប្រើថ្នាំអង់ទីប៊ីយូតិច តាមការណែនាំរបស់គ្រូពេទ្យមុនពេលចូលគេង ព្រោះបាក់តេរីនៃជំងឺភ្នែកក្រហមរាលដាលកាន់តែខ្លាំងនៅពេលយប់។
ដោយឡែក ក្នុងករណីដែលភ្នែកក្រហមមិនព្រមបាត់ទៅវិញក្នុងរយៈពេល ១ សប្ដាហ៍ ព្រមទាំងចេញរោគសញ្ញាមួយចំនួនថែមទៀតដូចជា ស្ថានភាពជំងឺកាន់តែធ្ងន់ធ្ងរ ឈឺភ្នែកខ្លាំង មើលមិនសូវឃើញ ឧស្សាហ៍ហៀរទឹកភ្នែក ភ្នែកកើតដំបៅដោយសារតែការរងរបួស សូមលោកអ្នកអញ្ជើញរុះរាន់ទៅជួបពិគ្រោះយោបល់ជាមួយគ្រូពេទ្យជាបន្ទាន់ ដើម្បីព្យាបាលទាន់ពេលវេលា ចៀសវាងផលវិបាកចំពោះភ្នែកកាន់តែធ្ងន់ធ្ងរ អាចឈានដល់ការពិការភាព។
៥. ផលវិបាក
ផលវិបាកនៃជំងឺភ្នែកក្រហម មិនត្រឹមតែធ្វើឱ្យយើងមានការឈឺចាប់នោះទេ ថែមទាំងបង្កឱ្យមានដំបៅលើកញ្ចក់ភ្នែក មានខ្ទុះក្នុងគ្រាប់ភ្នែក និងស្វិតសរសៃបាតភ្នែក និងធ្ងន់ធ្ងរគឺធ្វើឱ្យអ្នកពិការភាព៕
- ស្រាវជ្រាវ និងកែសម្រួលដោយ៖ សុខក្រម-Sokhakrom
