តើអ្នកគួរញ៉ាំ និងមិនគួរញ៉ាំអាហារណាខ្លះនៅរដូវភ្លៀង? 

ការស្រាវជ្រាវបានឱ្យដឹងថា នៅក្នុងរដូវភ្លៀងអាហារងាយនឹងឆ្លងមេរោគណាស់ ដែលបង្កជាជំងឺរាករូស ជំងឺផ្សេងៗ និងធ្វើឱ្យយើងមានអារម្មណ៍មិនស្រួលខ្លួន។ ដូច្នេះ ការប្រុងប្រយ័ត្នខ្ពស់ក្នុងការទទួលទានអាហារ គឺជារឿងចាំបាច់បំផុត។  

តាមរយៈអត្ថបទខាងក្រោមនេះ អ្នកនឹងដឹងថា អាហារប្រភេទណាសមស្របគួរទទួលទាន និងអាហារប្រភេទណាមិនគួរទទួលក្នុងរដូវភ្លៀងនេះ ៖ 

+ អាហារសមស្រប

១. ស៊ុបក្តៅៗ៖ ប្រភេទអាហារដ៏អស្ចារ្យមួយនៅរដូវភ្លៀង ដើម្បីបង្កើនប្រព័ន្ធការពាររាងកាយ ប្រឆាំងនឹងជំងឺមួយចំនួនដូចជាផ្តាសាយ និងក្អក តែអ្នកត្រូវចៀសវាងស៊ុបធ្វើស្រាប់ក្នុងកំប៉ុង ព្រោះថាវាមានផ្ទុកជាតិថែរក្សាឱ្យបានយូរ និងមានអំបិលខ្ពស់ផងដែរ។
២.ខ្ទឹមស៖ ប្រភេទអាហារដែលមានដាក់ខ្ទឹមសពិតជាល្អ ដោយសារខ្ទឹមសមានផ្ទុកនូវអង់ទីអ៊ុកស៊ីដង់ ជួយបង្កើនប្រព័ន្ធការពាររាងកាយ និងគ្រប់គ្រងដំណើរការមេតាប៉ូលីស។
៣. អាល់ម៉ុង៖ ប្រភេទអាហារសម្រន់ដ៏អស្ចារ្យមិនថាក្នុងរដូវណាឡើយ ប៉ុន្តែចំពោះរដូវវស្សា ការញ៉ាំគ្រាប់អាល់ម៉ុងអាចបង្កើនការការពារបន្ថែមប្រឆាំងនឹងជំងឺផ្សេងៗ គ្រប់គ្រង ឬរក្សារមេតាប៉ូលីស។
៤. ផ្លែទទឹម៖ ប្រភេទផ្លែឈើល្អបំផុតមួយសម្រាប់ការទទួលទាននៅរដូវភ្លៀង ដោយសារវាជា ប្រភពនៃវីតាមីនC ជួយបង្កើនប្រព័ន្ធការពាររាងកាយប្រឆាំងមេរោគ និងជំងឺមួយចំនួន។
៥. តៅហ៊ូ៖ អាហារកែច្នៃភាគច្រើនមិនត្រូវបានណែនាំឱ្យទទួលទាននៅរដូវភ្លៀងឡើយ យ៉ាងហោចណាស់កុំទទួលទានច្រើនពេក។ ចំពោះតៅហ៊ូដែលជាអាហារកែច្នៃនេះ អាចជាជំនួយដ៏អស្ចារ្យ ដោយសារវាសម្បូរដោយកាល់ស្យូម ជាតិដែក និងអាស៊ីតអាមីណេសំខាន់ៗ។
៦. ទឹក៖ សូមកុំភ្លេចបំពេញជាតិទឹកឱ្យបានគ្រប់គ្រាន់ ហើយត្រូវប្រាកដថាទទួលទានទឹកស្អាត និងទឹកឆ្អិនដែលបានដាំពុះ ដោយហេតុថានៅពេលជាតិទឹកក្នុងរាងកាយគ្រប់គ្រាន់ធ្វើឱ្យរាងកាយខ្លាំង និងអាចការពារពីការងាយបង្ករោគ ។
 
+ អាហារគួរចៀសវាង

១.ស្វាយ៖ ផ្លែឈើនៅរដូវក្តៅមួយប្រភេទនេះ មិនត្រូវបានណែនាំឱ្យទទួលទាននៅពេលចាប់ផ្តើមមានភ្លៀងធ្លាក់ឡើយ ដោយសារវាមានលទ្ធភាពអាចបង្កឱ្យងាយកើតមុន។
២. យ៉ាអួរ៖ ជំងឺផ្តាសាយ ក្អក រលាកប្រហោងឆ្អឹងមុខ កើតមានញឹកញាប់បំផុត ហើយប្រសិនថែមការទទួលទានយ៉ាអួរទៀតនោះ ជំងឺនឹងកាន់តែធ្ងន់ធ្ងរ ឬមិនងាយជាសះស្បើយឡើយ។
៣. ទឹកដោះគោ៖ ទោះបីទឹកដោះគោជាប្រភពនៃជីវជាតិក៏ដោយ អ្នកគួរទទួលទានដោយប្រុងប្រយ័ត្ន ព្រោះវាអាចងាយនឹងផ្តល់គ្រោះថ្នាក់នៅក្នុងអាកាសធាតុដែលមាននូវសំណើមខ្ពស់។
៤. ទឹកកកឈូស និងការ៉ែម៖ អ្នកប្រហែលចូលចិត្តអាហារប្រភេទនេះណាស់ តែវាជាអាហារដែលអ្នកគួរតែចៀសវាងសម្រាប់អំឡុងពេលភ្លៀង ដោយសារវាអាចប្រមូលផ្តុំនូវមេរោគឆ្លងតាមទឹក។
៥. ភេសជ្ជគ្រប់ប្រភេទ៖ អ្នកជំនាញបានលើកឡើងថាភេសជ្ជៈភាគច្រើនបន្ថយសារធាតុរ៉ែក្នុងរាងកាយ និងសកម្មភាពអង់ស៊ីម ជាលទ្ធផលធ្វើឱ្យប្រព័ន្ធរំលាយអាហារថយចុះ និងកើននូវហានិភ័យនៃបញ្ហាប្រព័ន្ធរំលាយអាហារ។
៦. អាហារសមុទ្រ-បង្គា៖ អ្នកគួរទទួលទានបង្គា ឬអាហារសមុទ្រផ្សេងទៀតក្នុងកម្រិតកំណត់ ឬមិនត្រូវទទួលទានច្រើនពេកឡើយ ព្រោះវាអាចថយចុះគុណភាពក្នុងរយៈពេលនេះ។
៧. អាហារប្រៃ៖ កាត់បន្ថយអាហារប្រៃតាមដែលអាចធ្វើបានមិនថាក្នុងរដូវភ្លៀង ឬរដូវក្តៅទេ ព្រោះថាកាលណាមជាតិប្រៃច្រើនអាចធ្វើឱ្យមានការរក្សាជាតិទឹកទុក និងធ្វើឱ្យអ្នកមានអារម្មណ៍ទន់ខ្សោយ។
៨. បន្លែ និងផ្លែឈើឆៅ៖ ការទទួលទានអាហារទាំងនេះអំឡុងពេលភ្លៀង ងាយនឹងប្រឈមនឹងការឆ្លងជំងឺ ទោះបីលាងសម្អាតជាមួយទឹកក៏ដោយ តែអត្រានៃការឆ្លងនៅតែខ្ពស់។
៩. អាហារតាមដងផ្លូវ៖ នៅពេលមានភ្លៀងធ្លាក់អាហារតាមផ្លូវងាយនឹងរងនូវការឆ្លងមេរោគខ្ពស់ ហើយអ្នកលក់ភាគច្រើនប្រើប្រាស់ជាតិពណ៌កែច្នៃដើម្បីបង្កើនភាពទាក់ទាញ និងអំបិលខ្ពស់ ដែលសារធាតុទាំងអស់នេះមិនល្អចំពោះសុខភាពឡើយ។

សូមទទួលទានអាហារដោយការប្រុងប្រយ័ត្នក្នុងរដូវភ្លៀង ដើម្បីខ្លួនអ្នក និងគ្រួសារជាទីស្រឡាញ់របស់អ្នក។ 

- ស្រាវជ្រាវ រៀបរៀង និងកែសម្រួលដោយ៖ ក្រុមការងារ សុខក្រម (Ms.DN)