យល់ដឹងពីជំងឺដំបៅក្រពះ

១. និយមន័យ

ក្រពះរបស់មនុស្សយើងមាន ៤ ស្រទាប់ ហើយជំងឺដំបៅក្រពះ កើតឡើងលើស្រទាប់ទី ៣ នៃក្រពះ។ 
ដំបៅក្រពះមាន ២ ប្រភេទ គឺ៖
- ដំបៅក្រពះស្រួចស្រាល 
- ដំបៅក្រពះរ៉ាំរ៉ៃ 

២. មូលហេតុបង្កជំងឺ

មានមូលហេតុជាច្រើនដែលបណ្ដាលឱ្យកើតជំងឺដំបៅក្រពះ ដូចជា៖ 
- ការប្រើប្រាស់ថ្នាំបំបាត់ការឈឺចាប់ (ឈឺចង្កេះ ខ្នង ឬសន្លាក់) ដែលប្រជាពលរដ្ឋនិយមហៅថាថ្នាំសរសៃ ដោយពុំមានវេជ្ជបញ្ជាត្រឹមត្រូវពីគ្រូពេទ្យ។
- មានមេរោគក្នុងក្រពះ
- ការរលាកពោះវៀនរាំរៃ ហើយទុករហូតដល់បង្កឱ្យមានដំបៅក្រពះ
- កត្តាតំណពូជ

៣. ការធ្វើរោគវិនិច្ឆ័យ

ដើម្បីឱ្យប្រាកដថា អ្នកជំងឺកើតជំងឺដំបៅក្រពះ ឬយ៉ាងណា គ្រូពេទ្យនឹងធ្វើរោគវិនិច្ឆ័យទៅលើអ្នកជំងឺដោយ៖ 
- សិក្សាលើរោគសញ្ញារបស់អ្នកជំងឺ
- សិក្សាពីប្រវត្តិប្រើប្រាស់ថ្នាំរបស់អ្នកជំងឺ
- ឆ្លុះមើល​ និងពិនិត្យសាច់
- ការពិនិត្យលើលាមក
- ធ្វើតេស្តផ្សេងៗ

៤. រោគសញ្ញា

- ឈឺនៅចំចុងដង្ហើម ដែលមានអាការឈឺរមួលនៅពេលឃ្លាន ឫទៅតាមពេលនៃអាហារ
- ជួនកាល អ្នកកើតជំងឺដំបៅក្រពះ មិនបានលេចចេញនូវរោគសញ្ញាឱ្យដឹងនោះទេ  

៥. កត្តាប្រឈម  

គ្រូពេទ្យបានកត់សម្គាល់ឱ្យដឹងថា ភាគច្រើនៃអ្នកជំងឺដំបៅក្រពះ គឺជាមនុស្សពេញវ័យ និងវ័យចំណាស់។ 

៦. ការព្យាបាល 

គ្រូពេទ្យនឹងព្យាបាលជំងឺដំបៅក្រពះ ដោយជាដំបូងពិនិត្យរកមូលហេតុចម្បងដែលបង្កជំងឺ រួចប្រាប់ឱ្យអ្នកជំងឺបញ្ឈប់សកម្មភាពនោះ។ ឧទាហរណ៍ ៖ បើការប្រើថ្នាំសរសៃ ជាមូលហេតុធ្វើមានដំបៅក្រពះ នោះអ្នកជំងឺត្រូវបញ្ឈប់ការប្រើថ្នាំសរសៃជាបន្ទាន់។ បន្ទាប់មក គ្រូពេទ្យអាចប្រើប្រាស់ថ្នាំទប់ទល់ និងបន្សាបជាតិអាស៊ីតក្នុងក្រពះជាដើម។

៧. ផលវិបាក 

- ហូរឈាមចេញពីដំបៅក្រពះ បណ្ដាលឱ្យអ្នកជំងឺក្អួតឈាម ឬបត់ជើងធំមកខ្មៅ 
- ស្ទះមាត់ច្រកចេញពីក្រពះទៅរកពោះវៀន
- អាចធ្លាយក្រពះ 
- ធ្ងន់ធ្ងរអាចបង្ករជាមហារីក 

៨. វិធីបង្ការ

- កុំប្រើបាស់ថ្នាំដោយគ្មានវេជ្ជបញ្ជា
- ជៀសវាងការប្រើប្រាស់ថ្នាំសរសៃ
- កុំពិសារសូរា
- បើមានអាការចុកឆ្អល់ត្រង់ចុងដង្ហើម ត្រូវមកពិគ្រោះជាមួយគ្រូពេទ្យជំនាញជាបន្ទាន់។ 

- បកស្រាយដោយ៖ វេជ្ជបណ្ឌិត ឆាយ គីមប៉ាវ នាយកផ្នែកជំងឺប្រព័ន្ធរំលាយអាហារនៃមន្ទីរពេទ្យមិត្តភាពខ្មែរ សូវៀត
- យកបទសម្ភាសន៍ រៀបរៀង និងកែសម្រួលដោយ៖ ក្រុមការងារ សុខក្រម (Sokhakrom)

@រក្សាសិទ្ធិគ្រប់យ៉ាងដោយ សុខក្រម