ពិស្ដារ! ទាក់ទងនឹងជម្ងឺផ្លូវចិត្តមួយប្រភេទគឺ តានតឹងក្នុងអារម្មណ៍
សុខភាព៖ ជម្ងឺផ្លូវចិត្តមានច្រើនប្រភេទ ហើយបញ្ហាតានតឹងក្នុងអារម្មណ៍ គឺជាផ្នែកមួយនៃជម្ងឺផ្លូវចិត្ត ដែលអាចនិយាយបានថា បញ្ហាតានតឹងក្នុងអារម្មណ៍ ត្រូវបានគ្រូពេទ្យផ្នែកចិត្តសាស្ត្រចាត់ទុកថា ជាជំងឺមួយប្រភេទនៃជំងឺផ្លូវចិត្ត។
បញ្ហាតានតឹងក្នុងអារម្មណ៍ កើតរាល់ថ្ងៃលើមនុស្សគ្រប់វ័យ តែមានកម្រិត និងទម្រង់ខុសៗគ្នា។ បញ្ហាតានតឹងក្នុងអារម្មណ៍ ដែលមានកម្រិតតិចតួចគឺជារឿងធម្មតាសម្រាប់មនុស្សគ្រប់រូប តែបើធ្ងន់ធ្ងរទើបជាបញ្ហាដែលត្រូវដោះស្រាយ ហើយត្រូវរកអ្នកជំនាញចិត្តសាស្ត្រព្យាបាល ដើម្បីទប់ស្កាត់លទ្ធផលចុងក្រោយយ៉ាងអនោចអធមរបស់អ្នកជម្ងឺ ព្រោះថា មនុស្សដែលស្ថិតក្នុងស្ថានភាពតានតឹងធ្ងន់ធ្ងរ ភាគច្រើនគឺមានទំនោរគិតទៅរកផ្លូវមិនល្អ ឬគិតខុស គិតខ្លីជាដើម។
+រោគសញ្ញានៃភាពតានតឹងផ្លូវចិត្តស្ដែងក្រោមរូបភាពដូចជា៖
- នៅពេលមនុស្សម្នាក់តានតឹងក្នុងអារម្មណ៍ យើងពិតជាមិនអាចមើលឃើញមែន តែយើងអាចកត់សម្គាល់តាមរយៈអារម្មណ៍របស់គាត់ ដូចជា ធ្វើអ្វីប្លែកៗជាដើម ដែលបង្ហាញឱ្យយើងឃើញថា មនុស្សម្នាក់នោះកំពុងតែស្មុគស្មាញ
- ជួបប្រទះបញ្ហាសម្រាន្តមិនលក់ ចេះតែគិត គិតពីនេះពីនោះ ចុងក្រោយមិនបានការអ្វីទាំងអស់ ហើយជួនកាលរសាប់រសល់ មិនដឹងថាខ្លួនឯងគិតអ្វី ចេះតែគិតរហូតទល់ភ្លឺក៏មានដែរ
- បញ្ហាក្រពះពោះវៀន ឈឺក្បាល រឹងសាច់ដុំ ឈឺសាច់ដុំ ចុកដៃចុកជើង មានអារម្មណ៍មិនសូវឃ្លាន អស់កម្លាំង
- អាការៈថប់អារម្មណ៍ ផ្នែករាងកាយ គឺមានអាកប្បកិរិយាច្រាសច្រាល ថប់បារម្ភ ប្រែប្រួលទម្លាប់ទទួលទាន រួមមានការមិនសូវទទួលទានអាហារ ឬទទួលទានច្រើន បាត់បង់ភាពរីករាយ អារម្មណ៍ផ្លាស់ប្ដូរ ឆាប់ច្រឡោត ឆាប់ខឹង និងធ្លាក់ទឹកចិត្ត។
+អំពីការព្យាបាល៖
១- ព្យាយាមធ្វើអ្វីដែលខ្លួនរីករាយ និងគិតអ្វីដែលវិជ្ជមាន កុំឧស្សាហ៍គិតអ្វីដែលនាំឱ្យប៉ះពាល់ដល់អារម្មណ៍របស់ខ្លួន
២- រកអ្នកណាដែលអាចទុកចិត្តបាន ហើយជជែកជាមួយគេដើម្បីរំសាយភាពតានតឹងរបស់ខ្លួន ព្រោះថា ភាពតានតឹងវាផ្ដើមចេញពីបញ្ហាដែលធ្វើឱ្យយើងស្មុគស្មាញ ព្រួយបារម្ភ និងខ្វល់ខ្វាយច្រើនរកដំណោះស្រាយមិនបាន
៣- ទំនេរពីការងារអាចឆ្លៀតហាត់ប្រាណ និងលេងកីឡា វាមិនត្រឹមតែកាត់បន្ថយភាពតានតឹងទេ ថែមទាំងល្អចំពោះសុខភាពថែមទៀតផង
៤- ដកឃ្លាពីការងារ ឬបញ្ហាអ្វីម្យ៉ាង ហើយងាកមកបង្កើតម៉ោងសម្រាក និងភាពសប្បាយឱ្យខ្លួនឯង ដូចជា ស្ដាប់ចម្រៀង ឬច្រៀងកម្សាន្ត មើលទូរទស្សន៍ ឬភាពយន្តរឿងដែលចូលចិត្ត ភាពយន្តតុក្កតា
៥- ទទួលទានដំណេកឲ្យបានគ្រប់គ្រាន់ និងទៀងទាត់ ហើយសូមចៀសវាងពិសាកាហ្វេដោយសារភាពតានតឹង ព្រោះវាប៉ះពាល់ដល់ការទទួលទានដំណេក
៦- ក្នុងករណីធ្ងន់ធ្ងរ សូមរកជំនួយពីអ្នកជំនាញវិជ្ជាជីវៈដូចជា អ្នកចិត្តសាស្ត្រ ឬគ្រូពេទ្យឯកទេសជាដើម។
ត្រូវចាំថា ឬសគល់នៃបញ្ហាតានតឹងក្នុងអារម្មណ៍ គឺបង្កឡើងដោយបញ្ហាដែលប្រមូលផ្ដុំជាបន្តបន្ទាប់ក្នុងអារម្មណ៍របស់យើង ដូច្នេះ ដំបូន្មានល្អបំផុតនិងសាមញ្ញ គឺត្រូវរកនរណាម្នាក់អាចទុកចិត្តជជែក ដើម្បីរំសាយអារម្មណ៍តានតឹង៕
-កែសម្រួល និងស្រាវជ្រាវដោយៈ សុខក្រម-Sokhakrom
-ប្រភពៈ ព័ត៌មានក្នុងស្រុក
