របបអាហារផ្ទុកជាតិកាល់ស្យូម ដែក និងកាកសរសៃគឺសំខាន់ណាស់សម្រាប់ក្មេងអាយុក្រោម ១០ ឆ្នាំ
សុខភាព៖ របបអាហារពិតជាសំខាន់ណាស់សម្រាប់ក្មេង។ របបអាហារដែលល្អបំផុតសម្រាប់ការលូតលាស់របស់ក្មេងអាយុក្រោម ១០ ឆ្នាំ គឺត្រូវតែសម្បូរទៅដោយជាតិ កាល់ស្យូម ជាតិដែក និងជាតិកាកសរសៃ។
ខាងក្រោមនេះជាការបញ្ជាក់ជូនអំពីអត្ថប្រយោជន៍នៃអាហារផ្ទុកសារជាតិកាល់ស្យូម ជាតិដែក និងជាតិកាកសរសៃ ចំពោះក្មេងអាយុក្រោម ១០ ឆ្នាំ។
១- ជាតិកាលស្យូម
ជាតិកាលស្យូម ពិតជាសំខាន់ខ្លាំងណាស់ក្នុងការបណ្ដុះកោសិកាឆ្អឹង ពង្រឹងឆ្អឹងឱ្យរឹងមាំ នឹងជំនួយដល់ការលូតលាស់ឆ្អឹងរបស់ក្មេង។ ក្នុងរបបអាហារប្រចាំថ្ងៃនៃក្មេងអាយុក្រោម ១០ ឆ្នាំ ត្រូវការទទួលទានជាតិកាលស្យូម ១៣០០ ម.ក។ អាហារដែលផ្ទុកជាតិកាលស្យូមមានដូចជា ទឹកដោះគោ និងផលិតផលធ្វើពីទឹកដោះគោដែលមានជាតិខ្លាញ់ទាប ឬគ្មានជាតិខ្លាញ់ (បើមិនចង់ធាត់ ញ៉ាំទឹកដោះគោប្រភេទនេះ) ប៊័ររឹង យ៉ាអួ និងទឹកដោះគោស្រស់ជាដើម។ ជាមួយគ្នានេះ អាហារដែលផ្ទុកសារធាតុកាលស្យូមខ្ពស់ មាននៅក្នុងបន្លែពណ៌បៃតង ត្រីល្អិតៗបំពង ឬត្រីខកំប៉ុង និងត្រីសាលម៉ន។ បន្ថែមពីលើនេះ ការហាត់ប្រាណដោយការរត់ត្រឹកៗ ការដើរ ការហែលទឹក ក៏ធ្វើឲ្យឆ្អឹងរឹងមាំដែរ។
២- ជាតិដែក
ជាតិដែក គឺពិតជាសំខាន់ណាស់ក្នុងការចូលរួមផលិតឈាមក្រហម ដើម្បីទប់ទល់អាការស្លេកស្លាំង និងដឹកនាំអុកស៊ីហ្សែនក្នុងរាយកាយ, ធ្វើឱ្យសាច់ដុំរឹងមាំ ពង្រឹងសុខភាពផ្លូវចិត្ត និងបង្កើនថាមពលដល់ក្មេង។ ក្នុងរបបអាហារប្រចាំថ្ងៃសម្រាប់ក្មេងដែលមានអាយុក្រោម ១០ ឆ្នាំ ត្រូវការទទួលទានជាតិដែក ១០-១៥ ម.ក្រ។ អាហារមានជាតិដែកខ្ពស់ គឺសាច់គោ សាច់ជ្រូក សាច់មាន់ ថ្លើម ឈាមជ្រូក ឈាមមាន់ ត្រីធូណា បង្គា សណ្តែកផ្សេងៗ និងផ្លែឈើក្រៀមជាដើម។ ក្នុងករណីរកឃើញថាក្មេងអាយុក្រោម ១០ ឆ្នាំខ្វះជាតិដែក សូមប្រញាប់មកពិគ្រោះជាមួយគ្រូពេទ្យជំនាញ ចៀសវាងការប្រើប្រាស់ថ្នាំជាតិដែកដោយគ្មានវេជ្ជបញ្ជា ព្រោះវាអាចបង្កជាគ្រោះថ្នាក់ដល់សុខភាពក្មេង។
៣- ជាតិកាកសរសៃ
ជាតិកាកសរសៃ (Fiber) ជាសារជាតិមួយជួយបង្កើនសុខភាពពោះវៀន ជំនួយដល់ការរំលាយអាហហាររបស់កុមារ។ របបអាហារក្នុងមួយថ្ងៃ ត្រូវការកាកសរសៃ៤+៥=៩ ក្រាម។ អាហារដែលផ្ទុកជាតិកាកសរសៃខ្ពស់ មានដូចជា បន្លែ ផ្លែឈើ ជាប្រចាំ រហូតក្លាយជាទម្លាប់ ដោយបរិមាណកាកសរសៃអង្ករ អាវ័ន ធញ្ញជាតិជ្សេងៗ ដូចជា សណ្តែកក្រហម សណ្តែកខ្មៅ និងសណ្តែកខៀវ។
ចំណាំ៖ មាតាបិតា និងអាណាព្យាបាលទាំងអស់ គួរតែចម្អិនអាហារដែលផ្ទុកសារជាតិទាំង ៣ ខាងលើនេះ ឱ្យក្មេងក្នុងបន្ទុកគ្រួសាររបស់ខ្លួនទទួលទានឱ្យបានច្រើន ដើម្បីជំនួយដល់ការលូតលាស់របស់ពួកគេទាំងរាងកាយ និងសតិអារម្មណ៍៕
-ស្រាវជ្រាវ និងកែសម្រួលដោយៈ សុខក្រម-Sokhakrom
-ប្រភពៈ ព័ត៌មានក្នុងស្រុក និងបរទេស
